შეიძინეთ სააფთიაქო პროდუქტი ონლაინ

ირბესარტანი/ჰიდროქლორთიაზიდი ნორმონი 150 მგ/12.5 მგ ტაბლეტები

ირბესარტანი და ჰიდროქლორთიაზიდი

მედიკამენტის მიღებამდე საჭიროა გამოყენების ინსტრუქციის ყურადღებით წაკითხვა, რადგან შეიცავს პაციენტისათვის მნიშვნელოვან ინფორმაციას.

- საჭიროა ინსტრუქციის შენახვა. შესაძლოა, წარმოიშვას მისი ხელახალი გაცნობის აუცილებლობა.

- დამატებითი კითხვების არსებობისას საჭიროა მკურნალ ექიმთან ან ფარმაცევტთან მიმართვა.

- მედიკამენტი განკუთვნილია მხოლოდ პაციენტისათვის. არ შეიძლება მისი სხვა პირებისათვის მიცემა. დაავადების სიმტომების მსგავსების მიუხედავად, ის შეიძლება საზიანო აღმოჩნდეს მათთვის.

- ნებისმიერი გვერდითი მოვლენის განვითარებისას პაციენტმა უნდა მიმართოს მკურნალ ექიმს ან ფარმაცევტს. ეს მოიცავს ისეთ შესაძლო გვერდით მოვლენებს, რომლებიც არ არის ჩამოთვლილი ინსტრუქციაში, იხ. პარაგრაფი 4.

ინსტრუქციაში მოცემულია:

1. რას წარმოადგენს ირბესარტანი/ჰიდ0როქლორთიაზიდი ნორმონი და მისი გამოყენება

2. რა უნდა იცოდეს პაციენტმა ირბესარტანი/ჰიდროქლორთიაზიდი ნორმონის მიღებამდე

3. ირბესარტანი/ჰიდროქლორთიაზიდი ნორმონის მიღების წესი;

4. შესაძლო გვერდითი მოვლენები;

5. ირბესარტანი/ჰიდროქლორთიაზიდი ნორმონის შენახვის წესი;

6. შეფუთვის შემცველობა და სხვა ინფორმაცია.

**

1. რას წარმოადგენს ირბესარტანი/ჰიდროქლორთიაზიდი ნორმონი და მისი გამოყენება **

ირბესარტანი/ჰიდროქლორთიაზიდი ნორმონი არის ორი აქტიური ნივთიერების - ირბესარტანისა და ჰიდროქლორთიაზიდის - კომბინაცია.

ირბესარტანი მიეკუთვნება ე.წ. ანგიოტენზინი II რეცეპტორების ანტაგონისტების მედიკამენტების ჯგუფს. ანგიოტენზინი II ნივთიერებაა, რომელიც წარმოიქმნება ორგანიზმში და უკავშირდება სისხლძარღვების რეცეპტორებს, რაც იწვევს მათ შევიწროებას. შედეგად იმატებს არტერიული წნევა. ირბესარტანი ხელს უშლის ანგიოტენზინი II-ის ამ რეცეპტორებთან დაკავშირებას. შედეგად, სისხლძარღვები ფართოვდება და არტერიული წნევა ქვეითდება.

ჰიდროქლორთიაზიდი მიეკუთვნება მედიკამენტების ჯგუფს (ე.წ. თიაზიდურ დიურეტიკებს), რომლებიც ზრდიან შარდის გამოყოფას, რაც იწვევს არტერიული წნევის დაქვეითებას.

ირბესარტანი/ჰიდროქლორთიაზიდი ნორმონის ორი აქტიური ნივთიერება ერთდროულად უფრო მეტად აქვეითებს არტერიულ წნევას, ვიდრე თითოეული მათგანი ცალ-ცალკე მიღებისას.

ირბესარტანი/ჰიდროქლორთიაზიდი ნორმონი გამოიყენება მაღალი არტერიული წნევის სამკურნალოდ, როცა არტერიული წნევა ადექვატურად არ კონტროლდება მარტო ირბესარტანის ან ჰიდროქლორთიაზიდის მიღებით.

2. რა უნდა იცოდეს პაციენტმა ირბესარტანი/ჰიდროქლორთიაზიდი ნორმონის მიღებამდე

დაუშვებელია ირბესარტანი/ჰიდროქლორთიაზიდი ნორმონის მიღება:

· თუ პაციენტი ალერგიულია (ჰიპერმგრძნობიარეა) ირბესარტანის ან ირბესარტანი/ჰიდროქლორთიაზიდი ნორმონის რომელიმე ინგრედიენტის მიმართ (ჩამონათვალი იხ. მე-6 პარაგრაფში);

· თუ პაციენტი ალერგიულია (ჰიპერმგრძნობიარეა) ჰიდროქლორთიაზიდის ან სხვა რომელიმე სულფონამიდების წარმოებულების მიმართ;

· თუ პაციენტი 3 თვეზე მეტი ხნის ფეხმძიმეა (ყველა შემთხვევაში უმჯობესია არ მოხდეს მედიკამენტის მიღება ორსულობის ადრეულ სტადიაზე, იხ. პარაგრაფი “ფეხმძიმობა”);

· თუ პაციენტს აღენიშნება ღვიძლის ან თირკმლის მძიმე პრობლემები;

· თუ პაციენტს აღენიშნება შარდის წარმოქმნის პრობლემა;

· თუ პაციენტს მუდმივად აღენიშნება კალციუმის მაღალი ან კალიუმის დაბალი დონე სისხლში;

· თუ პაციენტს აღენიშნება დიაბეტი ან თირკმელების ფუნქციის დაქვეითება და მკურნალობს არტერიული წნევის დამაქვეითებელი მედიკამენტით, რომელიც შეიცავს ალისკირენს.

ირბესარტანი/ჰიდროქლორთიაზიდი ნორმონი არ უნდა იქნას მიღებული ბავშვებსა და მოზარდებში (18 წლის ასაკამდე).

გაფრთხილებები და სიფრთხილის ზომები

საჭიროა ექიმთან ან ფარმაცევტთან კონსულტაცია ირბესარტანი/ჰიდროქლორთიაზიდი ნორმონის მიღებამდე:

· თუ პაციენტს აღენიშნება ძლიერი ღებინება ან ფაღარათი;

· თუ პაციენტს აღენიშნება თირკმლის პრობლემები ან გადანერგილი აქვს თირკმელი;

· თუ პაციენტს აღენიშნება გულის პრობლემები;

· თუ პაციენტს აღენიშნება ღვიძლის პრობლემები;

· თუ პაციენტს აღენიშნება დიაბეტი;

· თუ პაციენტს აღენიშნება სისტემური წითელი მგლურა (შLE);

· თუ პაციენტს აღენიშნება პირველადი ალდოსტერონიზმი (მდგომარეობა, რომლის დროსაც თირკმელზედა ჯირკვლები გამოიმუშავებს ჭარბი რაოდენობით ჰორმონ ალდოსტერონს, რაც იწვევს ნატრიუმის შეკავებას და შედეგად, არტერიული წნევის მომატებას);

· თუ პაციენტი იღებს ქვემოთ ჩამოთვლილ რომელიმე მედიკამენტს მაღალი არტერიული წნევის (ჰიპერტენზიის) სამკურნალოდ:

• აგფ ინჰიბიტორებს (მაგ.: ენალაპრილს, ლიზინოპრილს, რამიპრილს), განსაკუთრებით, თუ პაციენტს აღენიშნება დიაბეტით გამოწვეული თირკმელების პრობლემები;

• ალისკირენს.

· თუ პაციენტს აღენიშნება კანის კიბო ან მოულოდნელად განუვითარდა კანის დაზიანებები მკურნალობის დროს. ჰიდროქლორთიაზიდით მკურნალობა, განსაკუთრებით, ხანგრძლივად და მაღალი დოზებით, ზრდის ზოგიერთი ტიპის კანისა და ტუჩის კიბოს რისკს (კანის არამელანომური კიბო). საჭიროა კანის დაცვა მზისა და ულტრაიისფერი გამოსხივებისაგან ირბესარტანით/ჰიდროქლორთიაზიდით მკურნალობის დროს.

· თუ პაციენტს აღენიშნება მხედველობის დაქვეითება ან თვალის ტკივილი, რომელიც შეიძლება იყოს თვალის სისხლძარღვოვან გარსში სითხის დაგროვების (ქოროიდული ეფუზია) ან თვალშიდა წნევის გაზრდის სიმპტომები და ეს შეიძლება განვითარდეს რამდენიმე საათში ან კვირებში ირბესარტანი/ჰიდროქლორთიაზიდი ნორმონის მიღების შემდეგ. თუ არ მოხდა ამ მდგომარეობის მკურნალობა, შეიძლება განვითარდეს მხედველობის მუდმივი დაკარგვა. თუ პაციენტს ანამნეზში აღენიშნება პენიცილინის ან სულფონამიდის მიმართ ალერგია, შეიძლება ამ მდგომარეობის განვითარების მაღალი რისკის ქვეშ იყოს.

შეიძლება საჭირო გახდეს თირკმელების ფუნქციის, არტერიული წნევისა და ელექტროლიტების (მაგ.: კალიუმის) დონის შემოწმება სისხლში რეგულარული ინტერვალებით.

იხ. აგრეთვე ინფორმაცია პარაგრაფში “დაუშვებელია ირბესარტანი/ჰიდროქლორთიაზიდი ნორმონის მიღება”.

ექიმს უნდა ეცნობოს, თუ პაციენტი ფეხმძიმედაა, ფიქრობს, რომ ფეხმძიმედაა ან გეგმავს ფეხმძიმობას. ირბესარტანი/ჰიდროქლორთიაზიდი ნორმონი არ არის რეკომენდებული ფეხმძიმობის ადრეულ სტადიაზე (პირველი 3 თვის განმავლობაში) და არ უნდა იქნას მიღებული ფეხმძიმობის ბოლო 6 თვის განმავლობაში, რადგან შეიძლება გამოიწვიოს სერიოზული ზიანი ნაყოფზე, იხ. პარაგრაფი ფეხმძიმობა

ექიმს ასევე უნდა ეცნობოს:

- თუ პაციენტი იმყოფება ნატრიუმის დაბალი შემცველობის დიეტაზე;

- თუ პაციენტს აქვს შემდეგი ნიშნები: პათოლოგიური წყურვილის შეგრძნება, პირის სიმშრალე, ზოგადი სისუსტე, ძილიანობა, კუნთების ტკივილი ან სპაზმები, გულისრევა, ღებინება ან აჩქარებული გულისცემა, რომელიც შეიძლება მიუთითებდეს ჰიდროქლორთიაზიდის ჭარბ ეფექტზე (რომელსაც შეიცავს ირბესარტანი/ჰიდროქლორთიაზიდი ნორმონი);

- თუ პაციენტს აღენიშნება კანის გაზრდილი მგრძნობელობა მზეზე, მზის დამწვრობის სიმპტომებით (როგორიცაა სიწითლე, ქავილი, შეშუპება, ბუშტუკების განვითარება), რომელიც ნორმალურზე უფრო სწრაფად ვითარდება;

- თუ პაციენტს უნდა ჩაუტარდეს ქირურგიული ოპერაცია ან უნდა გაუკეთდეს ანესთეზია.

მედიკამენტში შემავალ ჰიდროქლორთიაზიდს შეუძლია დოპინგის საწინააღმდეგო ტესტის დადებითი შედეგის გამოწვევა.

**სხვა მედიკამენტები და ირბესარტანი/ჰიდროქლორთიაზიდი ნორმონი **

მკურნალ ექიმს ან ფარმაცევტს უნდა ეცნობოს, თუ პაციენტი იღებს, უახლოეს წარსულში იღებდა ან აპირებს, მიიღოს ნებისმიერი სხვა მედიკამენტი.

დიურეზულმა საშუალებამ, როგორიცაა ჰიდროქლორთიაზიდი, რომელიც შედის ირბესარტანი/ჰიდროქლორთიაზიდი ნორმონის შემადგენლობაში, შეიძლება გავლენა იქონიოს სხვა მედიკამენტების ეფექტზე. პრეპარატები, რომლებიც შეიცავენ ლითიუმს, არ უნდა იქნას მიღებული ირბესარტან/ჰიდროქლორთიაზიდ ნორმონთან ერთად ექიმის მეთვალყურეობის გარეშე.

ექიმმა შეიძლება შეცვალოს დოზა და/ან მიიღოს სხვა სიფრთხილის ზომები:

თუ პაციენტი იღებს აგფ ინჰიბიტორს ან ალისკირენს (იხ. ასევე ინფორმაცია პარაგრაფში „დაუშვებელია ირბესარტანი/ჰიდროქლორთიაზიდი ნორმონის მიღება“ და „გაფრთხილებები და სიფრთხილის ზომები“).

საჭიროა სისხლის ანალიზების ჩატარება, თუ პაციენტი იღებს შემდეგ მედიკამენტებს::

- კალიუმის დანამატები;

- კალიუმის შემცველი მარილის შემცვლელები;

- კალიუმის შემნახველი მედიკამენტები ან სხვა დიურეტიკები (შარდმდენები);

- ზოგიერთი საფაღარათო საშუალება;

- პოდაგრის სამკურნალო მედიკამენტები;

- ვიტამინი D-ს დანამატები;

- გულის რითმის გასაკონტროლებელი მედიკამენტები;

- დიაბეტის სამკურნალო მედიკამენტები (პერორალური საშუალებები ან ინსულინი).

ასევე, მნიშვნელოვანია ექიმს ეცნობოს, თუ პაციენტი იღებს არტერიული წნევის დამწევ სხვა მედიკამენტებს, სტეროიდებს, კიბოს სამკურნალო მედიკამენტებს, ტკივილგამაყუჩებლებს ან ართრიტის სამკურნალო მედიკამენტებს.

ირბესარტანი/ჰიდროქლორთიაზიდი ნორმონის მიღება საკვებთან და სასმელთან ერთად

ირბესარტანი/ჰიდროქლორთიაზიდი ნორმონის ტაბლეტების მიღება შეიძლება როგორც საკვებთან ერთად, ისე კვებისგან დამოუკიდებლად.

ირბესარტანი/ჰიდროქლორთიაზიდი ნორმონის შემადგენლობაში შემავალი ჰიდროქლორთიაზიდის გამო, მკურნალობის დროს ალკოჰოლის მიღებისას შეიძლება გაძლიერდეს თავბრუსხვევა ადგომისას, განსაკუთრებით, მჯდომარე პოზიციიდან ადგომისას.

ფეხმძიმობა და ძუძუთი კვება

ფეხმძიმობა

ფეხმძიმობის, შესაძლო ფეხმძიმობის ან ფეხმძიმობის დაგეგმვის შემთხვევაში საჭიროა მკურნალი ექიმის ინფორმირება. ჩვეულებრივ, ირბესარტანი/ჰიდროქლორთიაზიდი ნორმონით მკურნალობა უნდა შეწყდეს ფეხმძიმობის დადგომამდე ან მაშინათვე, როცა პაციენტი შეიტყობს მის შესახებ. მის ნაცვლად უნდა დაინიშნოს სხვა ანტიჰიპერტენზიული მედიკამენტი. ირბესარტანი/ჰიდროქლორთიაზიდი ნორმონი არ არის რეკომენდებული ფეხმძიმობის ადრეულ სტადიაზე და მისი მიღება დაუშვებელია ფეხმძიმობის პირველი 3 თვის შემდეგ, რადგან შეიძლება გამოიწვიოს ნაყოფის მძიმე დაზიანება ამ სტადიაზე მიღების დროს.

ძუძუთი კვება

მკურნალ ექიმს უნდა ეცნობოს, თუ პაციენტი არის მეძუძური დედა ან აპირებს ძუძუთი კვებას, რადგან ირბესარტანი/ჰიდროქლორთიაზიდი ნორმონი არ არის რეკომენდებული ძუძუთი კვების დროს. ექიმმა შეიძლება შეარჩიოს სხვა მკურნალობა, თუ პაციენტი აგრძელებს ძუძუთი კვებას, განსაკუთრებით, თუ ბავშვი ახალშობილი ან დღენაკლულია.

ავტომობილისა და სხვა მექანიზმების მართვა

არ ჩატარებულა კვლევები ავტომობილის ან სხვა მექანიზმების მართვის უნარზე გავლენის შესახებ. არ არის მოსალოდნელი, რომ ირბესარტანი/ჰიდროქლორთიაზიდი ნორმონმა გავლენა იქონიოს ავტომობილის ან სხვა მექანიზმების მართვის უნარზე. თუმცა, ზოგჯერ შეიძლება განვითარდეს თავბრუსხვევა ან სისუსტე მაღალი არტერიული წნევის მკურნალობის დროს. ამ მოვლენების განვითარების შემთხვევაში საჭიროა ექიმთან ან ფარმაცევტთან კონსულტაცია ავტომობილის ან სხვა მექანიზმების მართვის დაწყებამდე.

მნიშვნელოვანი ინფორმაცია ირბესარტანი/ჰიდროქლორთიაზიდი ნორმონის ზოგიერთი ინგრედიენტის შესახებ

მედიკამენტმა შეიძლება გამოიწვიოს დისპეფსია და დიარეა, რადგან შეიცავს ჰიდროგენიზებულ აბუსალათინის ზეთს.

მედიკამენტი შეიცავს ლაქტოზას. თუ პაციენტს დადგენილი აქვს აუტანლობა რომელიმე შაქრის მიმართ, საჭიროა ექიმთან კონსულტაცია ამ მედიკამენტის მიღებამდე.

3. ირბესარტანი/ჰიდროქლორთიაზიდი ნორმონის მიღების წესი

ირბესარტანი/ჰიდროქლორთიაზიდი ნორმონის მიღება ყოველთვის უნდა მოხდეს ზუსტად ექიმის ან ფარმაცევტის დანიშნულების მიხედვით. თუ პაციენტი არ არის დარწმუნებული, საჭიროა მკურნალ ექიმთან ან ფარმაცევტთან კონსულტაცია.

ირბესარტანი/ჰიდროქლორთიაზიდი ნორმონის ჩვეულებრივი დოზაა ერთი ან ორი ტაბლეტი დღეში. ირბესარტანი/ჰიდროქლორთიაზიდი ნორმონი ჩვეულებრივ ინიშნება ექიმის მიერ, როცა წინა მკურნალობამ არ დააქვეითა არტერიული წნევა საკმარისად. მკურნალი ექიმი პაციენტს მისცემს ინსტრუქციას, როგორ უნდა შეიცვალოს მკურნალობა ირბესარტანი/ჰიდროქლორთიაზიდი ნორმონით.

ირბესარტანი/ჰიდროქლორთიაზიდი ნორმონი განკუთვნილია შიგნით მისაღებად. ტაბლეტები უნდა გადაიყლაპოს საკმარისი რაოდენობის სითხესთან (მაგ.: ჭიქა წყალთან) ერთად. ირბესარტანი/ჰიდროქლორთიაზიდი ნორმონის მიღება შეიძლება როგორც საკვებთან ერთად, ისე საკვების გარეშე. მედიკამენტის მიღება უნდა მოხდეს ერთსა და იმავე დროს, ყოველდღე. მნიშვნელოვანია, რომ ირბესარტანი/ჰიდროქლორთიაზიდი ნორმონის მიღება გაგრძელდეს ექიმის ინსტრუქციის მიხედვით.

არტერიული წნევის დამწევი მაქსიმალური ეფექტი მიიღწევა მკურნალობის დაწყებიდან 6-8 კვირის შემდეგ.

ირბესარტანი/ჰიდროქლორთიაზიდი ნორმონის დოზის გადაჭარბებისას

დიდი რაოდენობით ირბესარტანი/ჰიდროქლორთიაზიდი ნორმონის მიღებისას საჭიროა ექიმთან ან ფარმაცევტთან მიმართვა.

დოზის გადაჭარბებისას ან შემთხვევით მიღებისას საჭიროა სამედიცინო ცენტრში დაუყოვნებლივ მიმართვა ან ტოქსიკოლოგიის საინფორმაციო სამსხურში დარეკვა (ტელ.: +34 91 562 04 20), მედიკამენტისა და მიღებული რაოდენობის მითითებით. რეკომენდებულია პაციენტმა თან იქონიოს მედიკამენტის შეფუთვა და გამოყენების ინსტრუქცია.

ბავშვებში გამოყენება:

ირბესარტანი/ჰიდროქლორთიაზიდი ნორმონი არ უნდა იქნას გამოყენებული 18 წლამდე ასაკის ბავშვებში. თუ ბავშვმა გადაყლაპა ტაბლეტები, საჭიროა ექიმთან დაუყოვნებლივ მიმართვა.

ირბესარტანი/ჰიდროქლორთიაზიდი ნორმონის დოზის გამოტოვებისას

დოზის მიღების დავიწყებისას შემდეგი დოზის მიღება უნდა მოხდეს ჩვეულ დროს. დაუშვებელია დოზის გაორმაგება გამოტოვებულის სანაცვლოდ.

მედიკამენტის მიღებასთან დაკავშირებით დამატებითი კითხვების არსებობისას საჭიროა ექიმთან ან ფარმაცევტთან მიმართვა.

4. შესაძლო გვერდითი მოვლენები

ყველა სხვა სამკურნალო საშუალების მსგავსად, ირბესარტანი/ჰიდროქლორთიაზიდი ნორმონიც იწვევს გვერდით მოვლენებს, თუმცა ისინი ყველას არ უვითარდება.

ზოგიერთი ეფექტი შეიძლება იყოს სერიოზული და საჭიროებდეს სამედიცინო დახმარებას.

კანის ალერგიული რეაქციების (გამონაყარი, ჭინჭრის ციება), ასევე კანის, ტუჩების და/ან ენის ლოკალური შეშუპების, იშვიათი შემთხვევები აღინიშნა ირბესარტანის მიღებისას პაციენტებში. თუ პაციენტს აღენიშნება ზემოთ აღწერილი სიმპტომები ან განუვითარდა ქოშინი, უნდა შეწყდეს ირბესარტანი/ჰიდროქლორთიაზიდი ნორმონის მიღება და საჭიროა ექიმთან დაუყოვნებლივ მიმართვა.

ირბესარტანი/ჰიდროქლორთიაზიდის კლინიკურ კვლევებში აღწერილი გვერდითი მოვლენებია:

ხშირი გვერდითი მოვლენები (შეიძლება აღინიშნოს ყოველი 100-დან 1-10 პაციენტში):

· გულისრევა/ღებინება

· შარდვის დარღვევა

· სისუსტე

· თავბრუსხვევა (მათ შორის წოლითი ან მჯდომარე მდგომარეობიდან ადგომისას)

· სისხლის ანალიზებში ფერმენტების დონის მომატება, რომელიც აჩვენებს კუნთის და ფულის ფუნქციას (კრეატინკინაზა) ან თირკმლის ფუნქციის მაჩვენებლების დონის მომატება (სისხლში შარდოვანას აზოტის, კრეატინინი).

თუ რომელიმე გვერდითი მოვლენა ქმნის პრობლემებს, საჭიროა ექიმთან კონსულტაცია.

არახშირი გვერდითი მოვლენები (შეიძლება აღინიშნოს ყოველი 1000-დან 1-10 პაციენტში):

· დიარეა

· დაბალი არტერიული წნევა

· გულისწასვლა

· ტაქიკარდია

· ალები

· შეშუპება სითხის შეკავების გამო

· სექსუალური დისფუნქცია (პრობლემები სექსუალური აქტის დროს)

· სისხლის ანალიზებში კალიუმისა და ნატრიუმის დაბალი დონე.

თუ რომელიმე გვერდითი მოვლენა ქმნის პრობლემებს, საჭიროა ექიმთან კონსულტაცია.

გვერდითი მოვლენები, რომლებიც აღინიშნა ირბესარტანი/ჰიდროქლორთიაზიდის პოსტმარკეტინგულ პერიოდში:

ამ მოვლენების განვითარების სიხშირე უცნობია. ეს ეფექტებია: თავის ტკივილი, ყურებში ხმაური, ხველა, გემოს დარღვევები, დისპეფსია, სახსრებისა და კუნთების ტკივილი, ღვიძლის ფუნქციის მაჩვენებლების ცვლილება და თირკმლის ფუნქციის დაზიანება, კალიუმის დონის მომატება სისხლში და ალერგიული რეაქციები, როგორიცაა გამონაყარი, ჭინჭრის ციება, სახის, ტუჩების, პირის, ენის ან ხორხის შეშუპება.

როგორც სხვა ორი აქტიური ნივთიერების კომბინირების დროს, არ შეიძლება გამოირიცხოს თითოეულ ინდივიდუალურ კომპონენტთან დაკავშირებული გვერდითი მოვლენები:

მხოლოდ ირბესარტანთან დაკავშირებული გვერდითი მოვლენებია:

გარდა ზემოთ ჩამოთვლილისა, აღწერილ იქნას ტკივილი მკერდის არეში და თრომბოციტების რაოდენობის შემცირება (სისხლის უჯრედების, რომლებიც მონაწილეობენ სისხლის შედედებაში).

მხოლოდ ჰიდროქლორთიაზიდთან დაკავშირებული გვერდითი მოვლენებია:

მადის დაკარგვა; კუჭის გაღიზიანება; მუცლის სპაზმები; ყაბზობა; სიყვითლე (კანის და/ან სკლერების გაყვითლება; პანკრეასის ანთება, რომელიც ხასიათდება მუცლის ზედა ნაწილში ძლიერი ტკივილით, ხშირად გულისრევითა და ღებინებით; ძილის დარღვევები; დეპრესია; მხედველობის დაბინდვა; მხედველობის დაქვეითება ან თვალების ტკივილი მაღალი წნევის გამო (თვალის სისხლძარღვოვან გარსში სითხის აკუმულაციის შესაძლო ნიშნები (ქოროიდული ეფუზია) ან მწვავე დახურულკუთხოვანი გლაუკომა); ლეიკოციტების რაოდენობის დაქვეითება, რომელმაც შეიძლება გამოიწვიოს ხშირი ინფექციები; ცხელება; თრომბოციტების რაოდენობის დაქვეითება (სისხლის უჯრედები, რომლებიც მნიშვნელოვანია სისხლის შედედებაში); ერითროციტების რაოდენობის შემცირება (ანემია), რომელიც ხასიათდება დაღლილობით, თავის ტკივილით, ქოშინით დატვირთვის დროს, თავბრუსხვევით და სიფერმკრთალით; თირკმელების დაავადება; ფილტვების პრობლემები, მათ შორის პნევმონია ან სითხის დაგროვება ფილტვებში; კანის გაზრდილი მგრძნობელობა მზეზე; სისხლძარღვების ანთება; კანის დაავადება, რომელიც ხასიათდება კანის აქერცვლით მთელ სხეულზე; კანისმიერი წითელი მგლურა, რომელიც ხასიათდება გამონაყარით სახეზე, ყელზე და სკალპზე; ალერგიული რეაქციები; სისუსტე და კუნთების სპაზმი; გულის სიხშირის ცვლილება; არტერიული წნევის დაქვეითება სხეულის პოზიციის შეცვლისას; სანერწყვე ჯირკვლების შეშუპება; შაქრის მაღალი დონე სისხლში; შაქარი შარდში; სისხლში გარკვეული ცხიმების დონის მომატება; შარდმჟავის მაღალი დონე სისხლში, რომელმაც შეიძლება გამოიწვიოს პოდაგრა; კანისა და ტუჩის კიბო (არამელანომური კანის კიბო) უცნობი სიხშირით.

დადგენილია, რომ ჰიდროქლორთიაზიდთან დაკავშირებული გვერდითი მოვლენები იზრდება ჰიდროქლორთიაზიდის მაღალ დოზებთან ერთად.

თუ რომელიმე გვერდითი მოვლენა იღებს მძიმე ხასიათს, ან აღინიშნება ისეთი გვერდითი ეფექტი, რომელიც არ არის ჩამოთვლილი ინსტრუქციაში, პაციენტმა უნდა აცნობოს ექიმს ან ფარმაცევტს.

გვერდითი მოვლენების შესახებ შეტყობინება

ნებისმიერი გვერდითი მოვლენის განვითარებისას საჭიროა მკურნალ ექიმთან ან ფარმაცევტთან მიმართვა. ეს მოიცავს ისეთ შესაძლო გვერდით მოვლენებს, რომლებიც არ არის ჩამოთვლილი ინსტრუქციაში.გვერდითი მოვლენების შესახებ შეტყობინება ხელს უწყობს წამლის უსაფრთხოების შესახებ მეტი ინფორმაციის შეგროვებას.

5. ირბესარტანი/ჰიდროქლორთიაზიდი ნორმონის შენახვის წესი

არ საჭიროებს შენახვის განსაკუთრებულ პირობებს.

ინახება ბავშვებისთვის მიუწვდომელ ადგილას.

დაუშვებელია ირბესარტანი/ჰიდროქლორთიაზიდი ნორმონის მიღება კონტეინერზე მითითებული შენახვის ვადის გასვლის შემდეგ, შენახვის ვადა გულისხმობს მითითებული თვის ბოლო დღეს.

დაუშვებელია პრეპარატის გადაგდება საკანალიზაციო წყალში ან საყოფაცხოვრებო ნაგავში. ნებისმიერი გამოუყენებელი შეფუთვის ან პრეპარატის გადაგდება უნდა მოხდეს აფთიაქებში განთავსებულSIGRE სიმბოლოთი აღნიშნულ ადგილებში. თუ პაციენტი არ არის დარწმუნებული, ნებისმიერი გამოუყენებელი პრეპარატის და კონტეინერის განადგურების შესახებ ინფორმაციის მისაღებად უნდა მიმართოს ფარმაცევტს. აღნიშნული ღონისძიებები ემსახურება გარემოს დაცვას.

6. შეფუთვის შემცველობა და სხვა ინფორმაცია

რას შეიცავს ირბესარტანი/ჰიდროქლორთიაზიდი ნორმონი 150 მგ/12.5 მგ ტაბლეტები

აქტიური ნივთიერებებია ირბესარტანი და ჰიდროქლორთიაზიდი.

სხვა დამხმარე ნივთიერებებია: პოვიდონი, მაგნიუმის სტეარატი, მიკროკრისტალური ცელულოზა, ლაქტოზის მონოჰიდრატი, ნატრიუმის კროსკარმელოზა, კოლოიდური უწყლო სილიციუმის დიოქსიდი, ჰიდროგენიზებული აბუსალათინის ზეთი და სიმინდის სახამებელი,

ირბესარტანი/ჰიდროქლორთიაზიდი ნორმონის ფორმა და შეფუთვა

ირბესარტანი/ჰიდროქლორთიაზიდი ნორმონი 150 მგ/12.5 მგ წარმოდგენილია ტაბლეტების სახით, რომელიც შეიცავს 150 მგ ირბესარტანს და 12.5 მგ ჰიდროქლორთიაზიდს.

ირბესარტანი/ჰიდროქლორთიაზიდი ნორმონი 150 მგ/12.5 მგ წარმოდგენილია შეფუთვით, რომელიც შეიცავს 28 ტაბლეტს.

გაცემის წესი:

ფარმაცევტული პროდუქტის ჯგუფი - II , გაიცემა ფორმა №3 რეცეპტით

შეიძინეთ სააფთიაქო პროდუქტი ონლაინ